Os equipos deben estar compostos por un mínimo de seis xogadores (e un máximo de 12) nados antes do 1 de xuño do ano 93. O gañador do I Campionato Galego de Balonmán Praia representará a Galicia na fase final do Campionato de España.

Inicio. Vilanova de Arousa acollerá a primeira proba que recibe o nome de “II Torneo Ibérico” e que será internacional, xa que está confirmada presenza de equipos portugueses tanto masculinos coma femininas. Ademais, o próximo ano este Torneo Ibérico disputarase en Portugal e os tres primeiros clasificados masculinos e femininos do I Campionato Galego están invitados a participar  neste torneo. Así, a de Vilanova de Arousa será a única cita internacional das seis que compoñen o campionato galego.

A segunda proba celebrarase en Bueu ( 2-3 de xullo), mentres que a terceira proba terá lugar en Nigrán (9-10 de xullo) (puntuábel para o Campionato de España) e as citas continuarán durante todo o mes de xullo: Vigo (16-17), Sanxenxo (23-24) e A Guarda (30-31). A clasificación do Galego realizarase sumando os tres mellores resultados dos seis torneos que conforman o campionato e para poder loitar polo título os equipos deberán disputar un mínimo de tres probas.

A modalidade do balonmán praia resulta moi espectacular para o público en xeral e, a pesares de que este ano é a primeira vez que se celebra o Galego, dende hai uns anos nas praias galegas se celebran varios torneos, nos que participan equipos de moi alto nivel, polo que o espectáculo parece seguro.